Eh… da hani jetz miseel über siebezg Jahr alt müesse wärde, für z’merke, das ii ja gar ki Schwizer bi. Ier hiit doch sicher o e so ne Iladig überchoe, für dä Schwizer Polit-Abe St. Stäffe.
Ja… da stiit doch klip u klar: Schwizer stimme doch äbe SVP… u fertig! Also bini doch gar ke Schwizer…. also iigetlich…. e «Ussländer»; üsi Familie isch zwar zrug verfolget bis is 1300 Jahrhundert ging i der Schwiz gsi, aber da chas natürlich guet si, das opa emal ina näbenusi tschalpet. Ja nu… i wohne ja recht nach bi Gstaad, u dert hii vor allem o «die ächte Schwizer» d’Ussländer gar net sövel ungärn – emel wesi Gäld hii.
Ja, u o süscht, füehle ni mi doch als «Ussländer» recht guet integriert, wier hii ja d’Mehrhiit! Zum Bispiel hii bi de letschte Wahle ja nume e knappa Drittel vo de Schwizer, i mine vo de ächte Schwizer, richtig gstimmt. Di andere si ja nach der Läseart als zäme «Ussländer» gsii. Oh… mit dem mues me chöne läbe, wier «Ussländer» wärde o das überläbe. I wünsche jedefalls e gueti Schwizer-Tagig. Aegsgüsi, mis Schwyzerdütsch isch vilicht net ganz a jour, aber für ne Ussläner doch no eso… E «Ussländer» u de no e Grüena vo Betleried, Blankenburg